بے خوابی کا مقابلہ کیسے کریں
رات کو نیند کا معیار بہتر کرنے اور بے خوابی کا مقابلہ کرنے لیے کئی ایسی ٹپس پر عمل کیا جا سکتا ہے جس سے سکون مل سکتا ہے، نیند دوست ماحول پیدا کیا جا سکتا ہے اور نیند کی روٹین کو بہتر بنایا جا سکتا ہے۔اسی سلسلے میں انڈین ٹی وی چینل این ڈی ٹی وی نے کچھ ٹپس بتائی ہیں جن سے ہم اپنی نیند کو بہتر بنا سکتے ہیں۔
آئیے جانتے ہیں وہ ٹپس کون سی ہیں۔
نیند کو بہتر بنانے کے لیے ہر روز سونے کا مستقل شیڈول بنائیں اور اس شیڈول پر عمل کریں۔ ایک مستقل شیڈول پر سونے اور جاگنے سے جسم قدرتی طور پر اپنے وقت پر سونے اور جاگنے کا عادی بن جاتا ہے۔
سونے سے قبل کتاب پڑھنے، گرم پانی سے نہانے یا گہرے سانس کی مشقیں کرنے جیسی سرگرمیاں کریں۔ باقاعدگی سے سونے سے جسم کو اپنے وقت پر نیند آنے کی عادت ہو جاتی ہے۔سونے سے تقریباً آدھا گھنٹہ قبل موبائل فون، ٹیبلیٹ، کمپیوٹر اور ٹی وی کو استعمال نہ کریں کیونکہ سکرین سے نکلنے والی بلیو لائٹ میلاٹونن نامی ہارمون کی پیداوار پر اثر انداز ہوتی ہے۔ سکرین کا محدود استعمال میلاٹونن ہارمون کے پیدا ہونے میں معاونت فراہم کرتا ہے جس سے سونے اور اٹھنے کی روٹین بہتر ہوتی ہے اور نیند اچھی آتی ہے۔اپنے بیڈ روم کو ٹھنڈا، خاموش اور تاریک رکھیں۔ نرم میٹرس اور تکیوں کا استعمال کریں۔ آرام دہ ماحول سے نیند کا معیار بہتر ہوتا ہے اور رات بھر نیند بغیر کسی دشواری کے پوری کی جا سکتی ہے۔دوپہر اور خاص طور پر رات کو کیفین اور نکوٹین کو لینا کم کریں۔ سونے سے قبل زیادہ کھانے سے گریز کریں۔ کیفین کی وجہ سے نیند کے معیار پر پریشانی کا سامنا کرنا پڑ سکتا ہے جبکہ زیادہ کھانے کی وجہ سے بدہضمی کے مسائل پیدا ہو سکتے ہیں جس سے نیند میں خلل پیدا ہو سکتا ہے۔دن بھر چست رہنے کی کوشش کریں لیکن سونے سے قبل سخت ورزش کرنے سے گریز کریں۔ باقاعدگی سے ورزش کرنے سے ذہنی دباؤ اور بے چینی کم ہوتی ہے جس سے نیند کا معیار بہتر ہوتا ہے۔ذہنی دباؤ کو کم کرنے کے لیے یوگا، تنفس یا تناؤ کم کرنے والی ورزشیں کریں۔ ذہنی دباؤ اور بے چینی کو کم کرنے سے دماغ اور جسم کو سکون ملتا ہے اور نیند جلدی آتی ہے۔اگر آپ دن کو قیلولہ کرنا ہی چاہتے ہیں تو اسے 20 سے 30 منٹ کے دورانیے تک محدود رکھیں اور شام کے وقت قیلولہ کرنے سے گریز کریں۔ دن کو زیادہ سونے سے رات کو نیند آنے میں دشواری کا سامنا کرنا پڑ سکتا ہے۔نیند کے معیار کو بہتر بنانے کے لیے شراب نوشی کی عادت کو ترک کر دیں۔ شراب نوشی کی عادت سے نیند کے مسائل پیدا ہوتے ہیں اور رات کو نیند سے بار بار بیدار ہونا پڑتا ہے۔
اگر آپ بے خوابی کا شکار ہیں تو اس کے علاج کے لیے کسی معالج سے رابطہ کریں۔ پیشہ ور معالج بے خوابی کی اصل وجوہات کی تشخیص کر سکتے ہیں اور اس کے علاج کے لیے تھراپی یا ادویات کا استعمال شروع کروا سکتے ہیں
